گوزلر یاغیشلیدیر، سینیخیبدیر کونول یامان
غمدن قوتارجاق اولمایاجاقدیر آمان آمان
دردین قیلینجی زخمه ووروب سینه سازینا
یانمیش فغان، اورکدن آخاندی زامان زامان
قوربانلیغا مینایا ساری اوز قویوبدولار
پیغمبرین(ص) بالالاری بیر بیر جوان جوان
قانلا یازیلمیش آلن یازی آلله آلینا
گویده ملکرین گوزو قاندیر ملالینا
جنتده روضه واردی نبی(ص) گوز یاشی توکور
زهراسینین(س) مصیبتینی هی آچیر بوکور
گویلر ملک لرین یاتاغی ماتمه باتیر
یئر غملرین مکانی اولور دالغا دالغا کور
هر آن یئتیم بالالارین ای وای آنام سسی
جانی اودا سالیر، اورگین بندلرین سوکور
لای لای دییهر ملک لر آناسیز بالالارا
توختاق وئرهر سوموکلره چاتمیش یارالارا
دونیا داشین علی(ع) گئرییه آتدیغی زامان
محرابدا قیزیل قان ایچی باتدیغی زامان
زهرین دادین دادان، جیگری لاختا لاختا قان
مظلوم امام حسن(ع)، آنایا چاتدیغی زامان
آل کساء سون بئشیگی قتلگاهدا
کسسک لی، ایستی تورپاق اوزو یاتدیغی زامان
کاشکی یئره یاتایدی اساسی بو عالمین
اولمازدی اوج بوجاغی، بو دردین بو ماتمین
جان اوستهیم بقیعلیلرین غربتی یانا
ایتگین مزاری آختاریرام من یانا یانا
مجنون کیمین یولوم اییلیب چوللره ساری
بیر گون نجف چوللری، بیر گونده کربلا
گاه گوز یاشی توکور بو کونول باغداد ایچره گاه
توتساقدا نالهلی باغیریر سرَّ مَن رأی
مین درد واردی منده کی درمان سیز اولموشام
بیردن بیره دئیيل کی، خراسان سیز اولموشام
نرگیزلی گوز وارمیدی کی جیران باخیشلیدیر
یالوارمادان بولوتلودو، غمدن یاغیشلیدیر
طعنه ووران آجی دیله اولسون بو آن عیان
عشقین ایشی زامان تانیمیر یایلی قیشلیدیر
کاروان یولا دوشهرسه، دئنه سور خراسانا
بیر یار واردی اوردا کی هجری آتیشلیدیر
خوشدور او چاغ کی بیزده یئتک اصله بیر داها
هجرانی بوشلایاق ساریشاق وصله بیر داها
فرهاد رسمیدیر، داغی داشی چاپا یارا
بلکه یارا یارا یئتیشه دلبره یارا
هئچ داغلاری بوراخمایاجاقدیر بو یانقیلی
چئخسا بو یولدا اوغرونا مین لر آجی یارا
ظالیم زامان اووچوسو اوولور اونو هر آن
اوز قویماسا خراسانا دوندرسین اوز هارا
یوز دفعه آرتا ، یوکسهله مین دفعه ده گوناه
داغلارداكي دلی اوا وار اوردا بير پناه
گول اوزلو یار! عشقینه آتدئم بو دونیانی
ترک ایلهدیم ائوی، ائشیگی، هر زادی یانی
من غربته دوشوب سنی غربتده تاپمادیم
ای نورلو گونش به سنین غربیتین هانی؟
هم صحن ایچره همده سارای ایچره هر زامان
قورباندی تربتین یانی مین شیعه نین جانی
بیر غمزهلی باخیشلا کونول اوخشا ای صنم
اوزگه دئیيل، قاپون قولودور باخ بری منم
سقاخانا یانی آقام عباس(ع) سو پایلاییر
هر بیر رواقدا آنا زهرا(س) قان آغلاییر
چون «کل ارض» الوبدو بیزه «کربلا» چولو
بو یئرده ده امام حسین(ع) داغی داغلاییر
شام غربتی روایتی، زیبنب مصیبتی
قومدان خراسانا غم ایله درد چاغلاییر
بو روضه ایچره غم اودو هرآن سونمهده
مین کربلانین حسرتی گوز یاشا دونمهده
شعر از :سجاد حسینی(برگزیده بخش جانبی جشنواره شعر رضوی ترکی آذری- ارومیه آبان ۸۸)
كمكي آراز از تاريخ ، ادبيات ،آيئن و سنن محلي آذربايجان با تكيه بر جلفاي ارس سخن مي گويد . تا شايد در اين هياهوي جهاني شدن و فراموشي گذشته و افتخارات آن ،يادگارهاي هزاران ساله پدرانمان را در ياد ها زنده نگاه داريم .از اصالت خود بدانيم وچراغ خودآگاهيمان را فروزان تر كنيم.